8月1日
一向覺得自己與水上活動絕緣，原因是小弟乃旱鴨子一名，再加上朋友圈子中比較少人搞這類節目，所以依家一把年紀至”處男下海”，0向度真係要好好多謝邀請我去既Maggie同Edmond。
講番個船河，個人認為這次是一次相當舒適、招積、出色、超級超值之旅。首先係天氣，藍天白雲、天朗氣清，雖然好曬，但遇正想曬黑既我就0岩0岩好…
其次係人腳，小弟一向怕social(其實係小弟怕”生保”…)，而今次好在成程冇騎呢怪，加上同我傾計既”生保人”都只係適可而止，吹幾句水果隻(又或者同行既男士(包括我)既注意力都被一眾熱力迫人既靚女奪去掛…)，基本上成個setting可以比我想靜就靜，想搭爹就搭爹，Perfect！另外要讚既係搞手們安排妥善之餘又玩得，先有一眾水上活動設施，連沙灘排球、”口立什”等星什野一應俱全，另外又會搞0下氣氛，玩0下野咁，幾過癮…不過最感動既就係原先諗住唔識游水既我最壞既情況係完全冇得玩所有水上活動，一味曬，點知先有快艇載我與船中幾隻旱鴨子到沙灘join大隊玩，再有回程前extra round既wakeboard，簡直係超額完成…
不過其實之前都唔太敢玩wakeboard，雖然都知道救生衣好可靠，但始終都覺得唔怕一萬…就0向我一早諗住放棄之時，同Chris(其中一位”生保人”)傾開計，傾傾?先知到原來佢都係”旱鴨子”，但佢就一早舉手話玩wakeboard…佢同我講之前都玩過好幾次，一d都冇問題，我見佢咁有信心，心中既顧慮當堂冇晒… 0向度要特別多謝Chris，令我可以初次體會玩wakeboard既樂趣，雖然試左5次都起唔到水(唔係死橕…有兩次真係差些少咋…)，但wakeboard真係好好玩，下次有機會一定再試，仲一定要上到水…可惜既係當日我與我既”啟蒙老師”阿Chris各有各忙，未有機會再傾幾句熟絡下…
大會既膳食安排都唔錯，當然唔會話大魚大肉果隻啦，但都幾豐富，仲食唔晒tim…先有大量薯片等”口立什”及多款野飲供應，正餐有雞粥、炒麵、炒烏冬、雞翼腸仔、魚旦牛丸、三文治，但最正既都係冰凍西瓜同芒果布甸，大熱天食冰凍西瓜固然一絕，但都遠遠不及芒果布甸正，個布甸係其中一位叫”阿九”既搞手handmade，仲要足料到芒果多過布甸，0岩晒我呢個芒果”fan屎”，又好食又有Heart…
其實重有好多好正既人同事，好似今次既主角 - 好靚仔既船啦、好Nice既艇家一家啦(阿爸爸同哥哥係我既Wakeboard教練)、水清沙幼既浪茄沙灘啦、全程搞笑又玩得既Eric同佢既女性分身Erica啦、影足全程既大會攝影師Edmond啦、回程時海同天連成一線既靚景啦…時至今日諗番都覺得好正…
講左咁耐，都未講價錢…成個舒適、招積、出色、超級超值之旅都只係$230，簡直係抵到爛… 要總結成個船河，唯有套用”著名”足球評述員黃興貴先生的名句 - 一個字”精彩”…(唔明既問0下身邊睇波既朋友啦~)
