Eason Xmas Remix

幸福摩天輪 x 不知所謂 x 我不好愛 x 大開眼戒 x 房不勝防 x 兄妹 x Lonely Xmas x 聖誕結 x 十面埋伏 x 落花流水 x 粵語殘片

Can I celebrate?

始do MC飲宴記

11及12月加埋總共有7個熟人結婚, 雖然同朋友講笑話呢兩個月要同人打工, 但由於當中多數是相識多年的朋友, 所以也樂於出席, 也替新人們高興… 而數當中"資歷"最深的, 就是我的小學二年級同學阿基, 結婚當日小弟亦是兄弟之一, 除左要晨咁早起身比較有難度之外, 其餘過程都只係忙而不亂, 接新娘玩兄弟果part仲出奇地咁easy…

當日除左做兄弟外, 自己亦有另一個身份, 就係大會MC… 做婚禮MC, 對我黎講可謂最高難度項目… 雖則我平時份人都會好多口水, 但一去到formal場合就好鬼死緊張, 而且之前飲得多既關係, 好既爛既司儀都見過, 亦都知道一個MC對成個婚宴氣氛既影響可以好大, 而對於一向以"公務員心態" (親愛的公務員朋友, 此詞絕無扁義, 我都不知幾渴望成為你地既一份子…)工作既我黎講, 呢D"揹重飛"既工作實在有好大壓力…

司儀稿係當日同Partner度既, 度好稿後我就好似鬼上身咁, 不斷來回踱步, 口中唸唸有詞, 直到正場上映…

其實開場MC出場到新人進場可能只有10分鐘至15分鐘左右, 但對我黎講就好似好耐咁… 話就話時間過得好慢, 但我感覺到我講野既速度係非常之快, 而成個人就處於一個精神非常繃緊既狀態, 可能因為緊張既關係啦… 到新人進場, 我先開始回復正常, 然後就係切餅, 合巹交杯同祝酒…

禮成! 我亦都功成身退… 返回席間, 成個人仲係呆呆地, 口裡食著乳豬, 但腦海係空白一片… 直到上第二道菜我先開始"返來囉"…

經此一役, 我忽然對果D可以0向台上從容不迫, 談笑風生, 滔滔不絕既"同行"心生景仰之情… 算吧啦, 睇黎我都唔係可以靠把口搵食既人黎架啦…

喂喂喂, 一月尾去滑雪啦喂~

時: 07年1月24到28
地: 北京南山
錢: $3,900 (行程完左可以選擇stay behind, 另加$500)
詳情可到X Game網站: http://www.xgamehk.com/cgi-bin/happenings.pl 睇睇~

有興趣既留個言比我或直接搵我啦~

停工通告

忽然想起那部很久以前的虛擬世界童話大製作, 這些年間我由男主到男配, 由金草到大茄, 再由茄呢啡到現在等通告, 情節可謂曲折離奇... 而劇種嘛, 大概可稱為懸疑奇情片, 到現在這一刻我還未能分辨出當中是真是假? 是虛擬是現實? 是巧合還是誤會? 是童話太美好? 還是現實太殘酷? 而戲中的起承轉合, 甜酸苦辣, 實在不足為外人道...

作為演員, 我已對導演付出最大的寬容, 但到頭來連最低的尊重也收不到, 與其永無止境地等通告, 我想還是早點退出罷...

That's the end of summer (Part III)

5. 文藝青年推介(III) x 3 - 萬世歌王 x 孔巨基 x 兒童不宜

除左3個concert, 呢個夏天仲睇左3個show, 各有各精彩...

5.1 萬世歌王@詹端文

看過詹端文客串的電影, 一定認同佢搞笑的功力, 正因如此, 上年入場睇<男人之虎>時, 不能避免地會有相當大的期望, 結果換來大大的失望, 雖然部份笑位都ok, 但其餘的都是硬滑稽或過份庸俗, 而末段正正經經想表達信息時, 對我來說則太heavy, 不是不能接受正正經經, 不搞笑的詹端文, 而是他的表達方式對我來說是太前, 太沈重了…

到<萬世歌王>推出, 可能是對"樂壇"這主題有興趣, 又或者想再給詹端文一個機會, 想也不想就買了飛, 而經<男人之虎>一役後, 今次我也"學精", 不再對此show有任何期望... 結果反而有驚喜, 好多笑位好到, 當中"Thousand mountain I go alone"大合唱最為出色, 而扮郭富城出場那刻則十分有台型, 表達信息也傾向soft sell, 令人好易受落...

個人認為, 功勞除了歸一人分飾n角, 全show一腳踢的詹sir外, 幕後林奕華的參與也佔相當大的功勞... 雖然不能證實, 但直覺地覺得能將此劇的信息包裝再soft sell出去, 這很像林奕華的手法, 就以"Thousand mountain I go alone"為例, 這種用港式翻譯搞gag的手法, 之前<東宮西宮>也用過...

Oh my god! 愈寫愈正經, 正經到我都驚, 實在有違我一向寫Blod既風格(有咩?)... 簡單d講, <萬世歌王>睇得過啦~

5.2 孔巨基@陳浩峰

自看過<東宮西宮>後, 對陳浩峰印象很深, 當中solo一段就更加技驚四座, 而這次<孔巨基>就更加將其solo的威力發揮至極, 直頭成個show一個人做晒... 全劇笑位同message都好到, 而三字經數白欖一段更令我五體投地...

一個人, 六個角色, 六把聲, 不斷走位, 不斷變聲, 每個角色仲有成萬字既對白要背...

一個字 – 服!

5.3 兒童不宜@黃子華

等足3年, 終於能夠第一次入場睇黃子華啦, 心情當然係10個興奮~ 0向度又要多謝幫手買飛既阿比仲有比媽, 可以終於比我有機會一嘗現場睇子華既心願~

誇張? 當冇炭用做完一年果陣時或者都可以咁講既, 但當睇完冇炭用VCD, 發覺自己miss左一個咁抵死啜核既show, 再加上2年幾都冇消息話佢會再做楝篤笑, 反而走左上去大陸拍正經到你驚既片同組band唱歌, 同時屋企隻十下十下楝篤笑同冇炭用, 就算睇到識背都仲會笑, 你就會感覺到我有幾"渴"黃子華啦...

講番個show, 正如桂神話齋 – 神奇, 頂級, 超卓! 精彩到不得了~

冇睇? 你唔好彩啦, 乖乖等睇VCD啦... 呵~呵~呵呵~

That's the end of summer (Part II)

4. 集體回憶演唱會 x 行貨演唱會x 咁先算係演唱會 x 等完再等演唱會

對於演唱會, 自己一向"奄尖", 甚少歌手能令我有買飛入場支持的衝動, 但單單今個夏天已睇了三次演唱會, 感覺各有不同...

4.1 集體回憶演唱會

講既當然係軟硬天師Long Time No See演唱會啦, 單單"集體回憶"四個字已值得買飛入場, 但能成功買到極難入手的$100飛, 當然要0向度再多謝阿比啦...

事實上以$100的價錢入場都已經物超所值, 再加上入場送個靚靚面具, 又賺左; 而成晚氣氛又好, d gag位又到, 快歌位又high, Encore位首"Encore"又絕, 感覺直頭賺凸左; 仲失驚無神請左張學友做嘉賓, 突然彈出黎整首"頭髮亂了", Oh my god! 簡直10個high, 再黎多首"你的名字 我的姓氏"同"每天愛你多一些"... 兩個字 – 殺晒!!!

呢d咪正宗"一張票, 睇到笑"囉~

4.2 行貨演唱會

之咪係"屈臣氏蒸餾水聽側田唱音樂會"囉... Standard慢歌位, Standard快歌位, Standard encore位, Standard跳兩野舞, Standard嘉賓, 總之演唱會要有既野佢有晒, 但全部都好行...

演唱會叫"屈臣氏蒸餾水聽側田唱音樂會", 雖然全名好"橋"口, 但一定要落, 點解? 因為全個音樂會同我張飛都係屈臣氏贊助, 冇0向屈臣氏做既朋友, 我都冇免費飛睇, 其實一向對阿側生興趣都唔大, 要比錢當然唔睇啦, 免費既咪當個節目囉...

既然全個音樂會由屈臣氏贊助, 佈景有屈臣氏Logo絕對唔奇, 側生口渴唔口渴都飲屈臣氏唔出奇, 但拎住唱歌仲要煞有介事咁舉高, 我覺得好突兀囉... 而佢同嘉賓黃品源同任賢齊一齊用屈臣氏cheers既時候, 我覺得好肉酸囉...

講開嘉賓, 阿任生同黃生開演唱會, 上黎唱兩咀宣傳0下都無可厚非, 雖然佢地d歌唔係我杯茶, 但都叫接受到, 但果日佢地整左首"勁歌金曲"Feel既K版 <眼淚> x <我一個人住> x <後來>, 立即聽到我O晒咀... 兩個字 – 救命!!! 其實女歌男唱好common, 但唔該唔好咁"雷頌德"feel好唔好? 最滴汗係估唔到黃生同任生都叫做"實力派"歌手, 居然要唱埋呢d"搵食歌", 只能夠講句世界難撈...

但彈還彈, 眼見側生成晚"扯"住把聲由頭唱到尾, 都見到佢真係唱得之人, 但唱得還唱得, 同梁漢文合唱"披頭四"時, 我完全分唔到佢唱緊既係和音係主音囉... 大佬, 唱歌有時都要分0下"莊閒", 明明和音, 唔該就唔好唱得大聲過主音啦, 搞到好似平時唱K搶唱咁, 好唔專業者...

講到呢到, 你地一定以為我同阿側生有仇, 但其實只不過我對演唱會有要求者, 就算免費都係咁話... 雖然成個演唱會都好Standard, 但估唔到都有驚喜位 - 原來阿側生都有佢幽默既一面, 0向多謝位度, 佢話：「多謝我既髮型師, 估唔到我都有髮型師呢?」幽自己一默之餘又顯得佢大方, 側生好野! 抵你食呢行飯既~

4.3 咁先算係演唱會

一個"好"的演唱會個個定義好唔同, 而對我黎講, At 17 Sing Sing Sing 演唱會是我聽過的演唱會中最High, 最好氣氛的一個, 全程屁股貼著椅的時間只有1/4, 其餘3/4的時間都是站著拍手同唱, 而且不只是我, 而是整個場館的人也是如此, 氣氛之好可想而知...

當晚最印象深刻的是她們重唱Eason的"大開眼戒", 和得好正~ 希望遲d演唱會CD會收錄番啦... 而整晚Rundown也相當之精彩, 絕無廁所位, 視覺與聽覺也得到相當的滿足, 咁先算係演唱會嘛~ 其他玩遊戲、做迷你音樂劇、玩雜技、搞爛gag、請歌迷上台玩"攝"時間、請同公司冇實力歌手上台賣廣告既"演唱會", 唔該唔好再扮野啦, 明明係成套歡樂今宵放0向紅館做, 扮咩鬼野演唱會呢?

4.4 等完再等演唱會

一路有睇我Blog的朋友大概都會估到, 係, 之咪又係陳綺貞囉... 心水清既陳綺貞歌迷, 大概你會提我"之前10月幾 咪有0向bar度搞過wild day out囉, 你冇去咩?"我當然知道, 而且都冇去... 2年前生力搞過同類型既bar show, 感覺好差, 氣氛怪怪, 個個歌迷狂閃狂影相, 仲以為去左記招... 自始以後就對佢搞d bar show冇晒信心啦...

講番轉頭, 子華棟篤笑等左我3年, 到今年終於可以一償心願, 而陳綺貞演唱會等左5年, 作為她的歌迷, 沒有抱怨, 唯有繼續支持繼續等啦...

講到呢度, 下集Part III大結局!!!

That's the end of summer (Part I)

雖然身上穿的仍然是"短打", 但中秋都過了個多星期的今天, 也應是向"夏季生活模式"說再見的時候... 今個夏天可謂近年來最充實的一個, 加上之前琳琳總總想寫又懶寫的東東, 不如在此為這個夏天埋一埋數吧...

1. 旦家康登場
之前成日話想曬黑, 但都係得果一陣既效果, 而今年經過一輪密麻麻既水上活動後, 結果曬得一身水上人膚色, 被朋友封為"旦家康", 不過依家想曬都冇得曬, 曬燈又唔係我杯茶, 睇黎想keep都好難...

2. 點解泰國咁好heir Part 2 添食之旅
7月初與一眾老死, 再來一次曼谷布吉之旅, 原先都諗過去未去過既蘇梅, 但最後曼谷布吉以一點之微勝出, 而呢一點, 亦都係最重要既一點, 就係泰國曼谷有得shopping, 雖然唔想認, 但面對從泰國買回來的星星什什雜物, shopaholic之稱號實在當之無愧... 而講到shopping, 我既must go當然係翟度翟, 誇張d講, 如果我去曼谷而冇去翟度翟買野的話就等於冇去...

雖然之前已經去過, 而今次亦都將shopping時間extend做兩個零鐘, 但面對翟度翟一望無際的鋪頭、一式一樣的鋪頭間隔及裝潢、亂中有序的分區、四通八達的通道，再加上有"路王"(熟識我的朋友都應該知我認路有幾"叻")之稱的我和朋友分開自己一個行, 結果就只有三個字 – 蕩 . 失 . 路... 好在, 千辛萬苦, 最後都同朋友會合番...

我王某在此立誓, 總有一日會成功完全征服翟度翟... 但睇黎最快都要下年先得...

布吉就一如上次般heir, 雖然去到曼谷時有雷暴, 第一日仲淋到隻野咁, 但幸好天公做美, 去到布吉就好天番少少... 而熱愛wakeboard的我, 選擇一支公去玩鋼索wakeboard... 雖然都係拉住個handle, 但鋼索wakeboard感覺就虛好多, 條鋼索一時就鬼死咁好力, 一時又成條軟皮蛇咁, 好唔"老黎", 最慘係上水果下, 佢係要岸邊上水, 同之前根深柢固既水中上水既concept好唔同, 好鬼難搞, 結果比佢監生拖左7,8次落水之後先學識, 另外最頂癮就係跌落水之後要自己游番岸邊上水, 遠的話就會有架電單車0向岸邊接你, 好騎呢...

唔記得同你地講, 玩wakeboard個地方係一個足球場咁大左右既湖, d湖水既乾淨程度, 我諗要熱愛Wakeboard如我既人先可以接受到囉... 簡單d講, 就係一湖死水... 聽過以上介紹, 我諗大家都知到呢個鋼索wakeboard有幾"新奇"同"好玩"啦...

3. 喪wake之夏
7次船河加6次跟教練學, 今個夏天可以話係wake到飽, 當然, 荷包也因此而"輕鬆"不少, 不過我覺得值得既, 尤其學識新動作果下簡直係十個興奮...

講住咁多, part II繼續...

開心到裂

終於做到surface 360啦!!! 超滿足!!!

Wake & Awake

經過短暫的不振後, 最後結論是: "無論有多不甘心, 還是好好面對現實吧..."

幸好我有一班最佳損友, 還有wakeboard, 預期將心力用來自尋煩惱, 倒不如用來喪wake一番好過~

真相

真相總是來得太快太突然, 突然到連心痛也來不及…
此刻的我腦海一片空白, 心中空洞洞, 只能看著螢光幕發呆…
到底我該苦笑? 該痛哭? 該裝若無其事? 還是該逃避?

真相總是來得太快太突然, 突然到連心痛也來不及…

道行未深

深夜偶然看到一封舊信, 心裡忽然湧起一份難過…

無論有多難過, 壓止了, 人, 還得好好睡覺…


搭巴士時經過"那裡", 腦海霎時浮現那時甜蜜的回憶…

無論有多留戀, 離開了, 車, 還得往目的地前進…


走在街上, Mp3聽筒傳來陳奕迅的舊歌, 整個人突然茫然若失…

無論有多迷網, 抖擻精神, 路, 還得繼續走下去…


朋友閒談間, 話題忽然落到"那個人"身上, 心裡立即滿不是味兒…

無論有多不快, 飯局未完, 朋友仍在, 笑, 還得繼續說下去…


看似豁達, 但都是事過境遷的這一刻才可做到…
坦白說, 當以上感覺湧現的那刻, 我還是有點兒不知所措, 甚至為此而失魂落魄, 生自己的氣…

顯然, 我的道行還未夠深…


道行未深的, 還有我的工作…

昨日好心做壞事而懵然不知, 還自以為幫了人, 但到今天收到email, 被人直斥自己之不是才當頭棒喝… 雖然心裡都同意自己的處理手法帶點問題, 但一種既羞且怒的感覺整日都揮之不去…正正式式是自己煩自己…

"討厭討厭討厭…好煩好煩好煩…"腦海中不斷響起這些訊號, 似為道行未深的我來一個reconfirmation…

別矣, 愛飛

不經不覺, 兩年的愛飛(IVE)校園生活便正式結束, 雖然這兩年的設計課程並不如想像中有趣, 但值得慶幸的, 是我遇上了一班有趣的同學, 多得他們, 令我再一次體驗到如像中學時代那種"柴嘩嘩"的校園生活…

在最後一課, 沒有離愁別緒, 大家都明白, 這只是一個階段的結束, 就算今後大家沒有在星期一二四見面, 就算沒有下課後的飯局, 只要那份情誼還在, 往後愛飛65514A班都同樣精彩。

Good & Bad News

Good News – It is possible!!! 美國萬x小太空人計劃終於轉廣告啦~ 自03年起, 每年暑假就不斷受此廣告煩擾, 並成功打入乞我憎廣告精選, 家陣終於可以"脫苦海"啦~ 開心晒~

Bad News – Sorry, 又係關於陳綺貞既… 演唱會暫定8月舉行… 天~ 又要等… 仲係暫定tim…

小Fans 2

才剛抱怨久久未有陳綺貞演唱會的消息, 沒想到, 在毫無先兆下, 轉頭在電視看到陳綺貞5月5日於朗豪坊舉行簽唱會的消息, 整個人當堂醒晒同開心晒... 雖然預期唱歌的部份不會太長, 但對我來說, 能聽她唱live, 給我一個"朝聖"的機會已是相當難得...

一直抱著極期待的心情去迎接5月5日的來臨, 沒想到, 自己的惰性及壞習慣, 差點令自己錯過這個重要的日子...

說的正是爛訓, 原訂1點起身, 早些到會場搵好位, 但當鬧鐘響起之時, 可能是昨天"碌齡"太累了吧, 小弟無意識間, 竟然使出獨門絕活「"禁"鐘無影手」x 2 - 於兩秒間把兩個鬧鐘停止, 昂然再進入夢鄉...

好夢正酣間, 一把聲音在腦海響起, 「你繼續訓既話, 會唔會miss左個簽唱會呀?」, 心下一涼, 一醒, 已是兩點多...

極速出門上巴士, 可惜到達旺角已是3點35分, 失望還失望, 但仍以生平最快速度直奔朗豪坊4樓… 不幸的是在上電梯時已聽到掌聲, "唉, 已經唱完起碼一首啦?"

到達4樓, 不顧一切的湧向人群, 進佔有利位置, 舉機就拍... 那時候, 已經唱了半首"旅行的意義"了... 唱畢, MC出場, 原來已是Encore時間...

在Encore了"吉他手"及"讓我想一想"後, 簽唱會"唱"的部份便告一段落, 接著就是簽名的時間...
其實本身對簽的部份興趣不大, 一向我都不明白為何這麼多人對偶像簽名這麼珍而重之, 畢竟只是一個名字罷了, 我喜歡的是她的歌嘛...

可能是來自錯過10分鐘的遺憾吧, 又可能是因為陳綺貞承諾會替每一位歌迷簽完名才走, 亦可能受桂神名句"有今生冇來世"的影響, 又或者可能距離8時15分mi3的開場時間尚餘4個多小時...
無論是那個可能, 初初說得大義凜然的我到頭來還是加入排隊等簽名的行列...

排隊的地方在朗豪坊上海街出口, 一個字 – 熱; 人龍, 一個字 – 長, 慶幸自己排在中間的位置, 不幸的是自己臨時決定加入, 毫無準備任何"過日晨"的items, 只好呆企…

等了大概一小時左右吧, 我最欣賞、最喜愛的歌手就近在咫尺... 5個, 4個, 3個, 2個, 忽然驚覺下一個就是我, 那刻連興奮和緊張也來不及, 只覺腦海一片空白...

遞上唱片, 簽了名, 握握手, 收回唱片, 禮成 - 但腦海空白依然...

回到台下, 呆若木雞, 試圖回想起剛剛那情景, 但印象卻甚模糊... 定過神來, 看看排在後面的歌迷一個個上台, 看看陳綺貞親切的微笑, 看看歌迷興奮的神情... 我想, 剛才我和他們也差不多吧...

一張簽名唱片, 幾段DC拍下的短片, 半天的滿足, 十分鐘的遺憾, 小Fans朝聖之旅正式結束...

To Tomoko 2

祝你幸福．快樂。

自然捲

自然捲? 光看這幾個字, 我想大多人都有如我最初一樣的摸不著頭腦… 自然捲其實是來自台灣由奇哥及娃娃組成的一對組合, 而我對他們的認識就從東touch的專欄開始…

"陳綺貞的聲線, My Little Airport的詞"

專欄中形容自然捲的這11個字深深吸引著我的視線 (坦白說, 單是"陳綺貞的聲線"這6個字就夠吸引了…) , 也引起了我的好奇 –"係未真係咁厲害呀?"

一聽之下, 發現專欄並冇"吹水", 而且所當對辦…

在陳綺貞演唱會音訊全無的這刻, 自然捲的出現正好給我這個陳綺貞"粉絲"止止咳… 但單以娃娃近似陳綺貞的聲線來作為喜歡自然捲的理由, 這未免有點以偏概全, 也對他們太不公平…

事實上, 除了娃娃聲線吸引外, 自然捲的曲和詞也所當精彩, 他們的歌大多是風格清新的中快版歌曲, 這正是小弟的那杯茶…

而歌詞方面, "My Little Airport的詞"這個形容也相當的"到", 在他們身上你不會找到"一淺白易明人就唱 我愛你抵死冇好收場"這種流行曲倒模式的歌詞, 取而代之的, 是一種生活化, 幽默俏皮的詞, 兩個字講晒, 好正!

可惜的, 是自然捲在推出了第二張專輯"大捲包小卷"後, 便要解散了… 有點相逢恨晚的感覺, 但就如文章所說, 至少我們已經擁有"自然捲"兩張專輯的美好吧…

不能期待他們的下一張專輯, 只好繼續等待不日舉行的陳綺貞演唱會好了…

天國與地獄

3月18日 – 老死結婚，極high的一夜，是天國…

3月20日 – 公司開會，準備不足、醜態百出、啞口無言的短短個多小時，是地獄…

我想我永遠也忘不了老細的那一個表情…

3月21 – 4月7日 – 工作工作工作…加班加班加班…Meeting Meeting Meeting…揹鑊揹鑊揹鑊…Report Report Report…死狗死狗死狗…補鑊補鑊補鑊…是無間地獄…

4月8日 – 困擾自己多時的公司Function終於順利完成，放下心頭大石，是天國…

天國、地獄、天國、地獄、天國、地獄… 過山車般的生活，想逃避、想躲懶，到頭來想躲也躲不了，連本帶利一併接受…

Cest La Vie? 唯有乖乖認命吧…

負能量戰士

懶散、heir、得過且過、遲到、恰眼訓、發“吽竇”、暴食…
負能量數值不斷上升中…

期待

3月．會展．陳綺貞．演唱會．絕對．期待．

System Reboot Completed

一五九的保齡個人新紀錄
一包朱古力
一個sms
兩份朋友送的聖誕禮物
一隻CD
一本"秘笈"
一次意料之外的約會
一部新手機
一次熱鬧的朋友聚會
一個group project
兩個好partner
一位好兄弟的提醒
一個長途電話
還有完成三份功課…

以上一切，點點滴滴，就是一個心情reboot的過程…

感激，還有謝．謝．