人生大事

25/8 · 5:00pm · 澳門旅遊塔 · 233m · Bungy Jump

期待 · 又忐忑

影評4.2

哈利波特 – 鳳凰會的密令

老實講, 我一向唔太buy哈仔, 一直投入唔到果種奇幻世界觀同驚險刺激, 所以基本上呢套戲都好難impress到我...

你或者會問我, 咁你又睇?
比幾十蚊可以慳番唔睇幾百頁書, 而且作為一套連續劇, 冇理由追追下唔睇架?

BTW, 套戲最精彩既都係套片名, 明既你固然會"會心微笑"; 唔明既你, sorry...唔好問我, 我都唔識解釋比你知...

Transformers

史匹堡好野!(雖然我知導演唔係佢, 但我諗佢都有好大credit既...)
估唔到真係可以將Transformers"真人化"而合情合理, 商業得黎又唔肉酸... 作為食Transformers奶水大既我地呢輩, 我諗都冇咩邊個唔收貨架啦...

雖然...
- 機械人做型唔算太型, 變型過程太複雜又睇到眼花...
- 麥生變左飛機之餘又冇啦啦多左d牙(改得咁勁, 唔怪得一解凍就要同人講"我係麥家登")...
- 柯生又多左把口(反而冇左跟佢尾果個"神奇貨櫃")...
- 最尾一場太花太亂...我連星星叫(比人昆左十幾廿年, 原來佢係叫star scream... 但個人都係鍾意猩猩叫多d, 個朵響好多...)著左草, 麥生點死都睇唔到...
- d配角機械人又太路人單乙丙, 一個比柯生練劍 (唔明柯生有把咁勁既架生, 同麥生打果陣又唔"立"黎用, 可能要赤手空拳隻揪先叫大佬本色掛...), 連大家熟識既爵士, 都比麥生一開二, 用黎突顯麥生幾勁...

不過, 以上都係小沙小石, 完全唔影響我對呢套片既評價, 單係"童年回憶"四字, 就已經值回票價...

成套片有兩個位覺得好正 –

1. 麥生0向水庫機地見到星星叫, 就同佢講
"星星叫,你又一次令我好失望啦..."
哈, 呢句可以話當年既經典, 平均10集卡通裡面, 起碼有8集會講呢句...史匹堡好野! 果然"原汁原味"...

2. 男主要拎舊能量磚著草, 同女主分頭走, 臨走前大家四目交投, 女主多謝男主, 我心諗"頂, 唔係跟住要深情一咀先走下話?", 要知道, 呢個係商業片既"必然位", 但個人就接受唔到呢d咁鬼老土既場面…
但史匹堡好野! 估唔到多謝完男主講兩句就走左, 瀟灑到暈(雖然比我就實咀架啦)... 大師即係大師, 係囉, 有時商業得黎都唔使咁老土架嘛...

影評4.1

成年幾冇寫影評, 今次一次過寫晒暑假睇過既戲...

Die Hard 4.0

錯! 呢套動作片叫咩名都得, 叫Die Hard就錯晒, 除左Bruce Willis做John McClaine外, 都睇唔出有幾Die Hard feel...

個人意見, 唔係John McClaine打極唔死就可以話係Die Hard, 今集拍唔出以往我最buy既困獸鬥元素(其實第3集都冇咩架啦), 而且另一樣我buy既就係扭橋 - 從第一集既奸角扮人質, 用FBI停電既策略去開夾萬, 到第二集特種部隊係內鬼, 到第三集使開所有警力去搵"詐"彈... 但今集條大橋直線到暈, 奸角又叻過頭, 一句話用電腦就咩都得, 完全冇晒以往果種"估佢唔到"既感覺...

講開奸角, 呢個奸角都算係最弱雞既一個, 冇個性, 演繹又太表面, 一d都壓唔到場...

更正, 其實呢套片有個位真係"估佢唔到", 就係估唔到John McClaine會單挑米格機, 見到果幕我直情呆左, 跟住就係O咀同滴汗, 有半秒我仲懷疑緊機上面果個係Bruce Willis定係阿諾舒華辛力加...
估唔到John McClaine會做呢D咁浮誇既野... 錯晒...

簡單講, 作為商業動作大片, 合格有餘, 但叫Die Hard就錯晒, 如果呢集你都好Buy, 覺得好正, 好Die Hard的話, 恭喜你, 你已經成為一個Die Hard既Die Hard Fans...

Welcome Back

很久不見 x 遇上100%的女孩2 x 華麗的冒險

Anyway, welcome back, my buddy~