Moments

15 . 9 . 2007 – Career low in work
17 . 9 . 2007 –"Career" high in "there"

Up & down, high & low, depressed & excited, heaven & hell, that's life...

交響情人夢 – Bravo~

呢期"了"起條筋煲劇, 繼喪煲23集Heros之後, 呢幾日仲KO埋11集《交響情人夢》, 勁好睇! 強硬推介!!!

好耐未試過睇劇睇到"毛管動"(當然講既係正面果隻啦), 套劇好Impressive之餘又好搞野, 將一個悶到爆既題材- 交響樂, 包裝得好型好有趣, 漫畫原作者同寫電視劇本果位仁兄應記一功, 音樂都好正, 仲搞到我去買左隻soundtrack添... 可以話係近期"我的最愛"...

年紀大 機器壞

個多月來斷斷續續的肩痛, 令一向崇尚使用"自然療法"(其實即係唔理佢)的我也得乖乖投降, 第一次投向跌打醫師的"懷抱", 但沒想到那位師傅同時也採用針炙, 過程雖然沒想像中痛及恐怖, 但眼看插在肩上的針, 感覺硬是怪怪的… 但不得不讚中國醫學之神奇, 經師博針炙+鬆筋+跌打藥後, 現在真的好了很多…

唉, 看來這次想不認老也不行啦…

影評4.3

索女 · 喪屍 · 機關槍
一套明買明賣cult片, 所以請對號入座, 喜歡者如我當然睇得過癮, 不喜無厘頭者就唔好睇啦…
套戲明玩 70s同80s low tech喪屍+動作片, 喪笑又過癮, 有一兩個位仲"估佢唔到"添, 10個好笑, 另類推介~

The Simpsons Movie
集Simpsons多年精髓之大成, 喪笑全場, 正!!! 10粒星滿分我會比11粒…

The Bourne Ultimatum
頭兩集冇睇, 但睇trailer覺得幾好, 於是入場捧0下場, 結果都相當滿意…
講番套戲, 主角雖然神通廣大, 但總算合情合理, 亦無故意將主角英雄化或超人化…而且戲情緊湊, 節奏明快, 絕冇冷場, 可以話係相當"易入口"的一套動作片…

喪玩長隆水上樂團

中學回憶既關係, 自海洋公園水上樂園摺左之後, 就一路對水上樂園有份情意結, 就連幾年前日本自由行時都身痕地去一趟當地的水上樂園"止止咳"...

其實幾年前深圳歡樂谷也有類似水上樂園的東東, 但始終對祖國的衛生環境有所顧忌, 所以都不願去作"勇士"...

到左今年, 位於番禺的長隆水上樂團高調落成且大做宣傳, 令我開始重拾對祖國的信心, 並打算今年夏天去一轉, 之但係...

1. 番禺實在太遠(由香港出發起碼要3小時車程, 唔係個個都有心"陪我癲")
2. 星期六日實在太多人(聽聞每樣遊戲要排1小時以上, 對急性子的我來說, 絕對係mission impossible)
3. 先住一晚, 第二日再玩, 但特登住一日又太"重皮", 而且對機動遊戲區, 馬戲或野生動物園冇咩興趣...

所以唯一的選擇就係平日即日來回, 但平日搵人又難...
幸好, 身邊還有兩位好兄弟 – K & B"橕"我, 終於, 渴望已久的長隆之旅終於成事啦~

玩既詳情唔多講啦(同兩個麻甩仔玩, 有咩好講Y...), 睇睇下面果日玩既次數同評語啦~ (以下係遊戲既官方名稱, 想睇樣的話可以去 http://www.chimelongwaterpark.com/nei3.htm 對照一下)

大滑板滑道 x 2 (少數為3人而設既遊戲, 估佢唔到地幾好玩)

噴射滑道 x 1 (2人專用, 當日唯一要排隊超過15分鐘既遊戲, 算ok, 但其實同其他用水泡玩既滑道分別不大, 人流又去得慢, 特登排隊玩就唔太值...)

離心滑道 x 2 (2人專用, 都係用水泡玩既滑道, 個名好似好有野, 但玩完送佢兩個字 - 好流...)

超級大喇叭 x 2 (3 - 4人專用, 好多人既must play, 玩過真係幾正, 如果背住沖落去就仲正! 不過個水泡超重同大, 好鬼論盡)

急馳競賽 x 4 (單人用, 可以夾埋幾個fd鬥, 另外垂直向下衝果下好正, 好玩之作, 誠意推介)

夏威夷水城 (唔使排任玩, 好似大型兒童遊樂場, 又滑梯, 又水槍, 但又估唔到幾過癮... 自虐之選: 大水桶照頭淋, 當地"名勝", 點都要淋一野... 不過淋得應的話都ok痛架啦...)

垂直極限 x 6 (單人用, 共3條滑水道, 橙色最快最好玩, 勁激!)

唔使排, 喪玩5粒幾鐘, 兩個字 – 勁正!!! 睇黎應該會搵日再上去 "止止咳"~

Hea遊澳門

除了跳第一次budgy jump外, 其實今次澳門之行也是第一次與大學好友一起外遊, 兩日一夜, 行行逛逛, 飲飲食食, 悠悠閒閒, 感覺相當不錯…

到步settle down後就前住官也街誠昌食其出名水蟹粥(水準還好, 小菜也ok), 然後就到觀光塔進行我的"人生大事" – 跳第一次budgy jump…

其實跳之前心情也頗平靜, 但當站在起跳點住下看時, 心下不禁一涼, 就連拍攝紀念照時也生硬得緊要… 緊張還緊張, 拍照後就得調整一下心情, 抬頭張手做好預備姿勢…

5, 4, 3, 2, 1…指導員接著一掌"送我一程", 就在眼睛再次望見233米下地面的那刻, 心下一怯, 雙腳就本能地縮了一下, 接著腦袋繃緊, 一片空白... 而眼前畫面就像zoom鏡般, 由遠至近的zoom過去… 而經過幾番上上落落的調整後, "人生大事"結束, 而我也終於回到地面, 但腦袋還是"當機"狀態, 所以當朋友走上前問好時, 人還是在遊魂…

雖然價錢貴了點, 但總算"求仁得仁", 有一個精彩難忘的budgy jump體驗…

個人認為由高空向下墮的那刻固然刺激, 但臨跳前的不安與開始跳下時因心怯而縮腳的那種"又要驚又要玩"的"人性"就更精彩, 要知道, 如玩跳樓機般, 只有第一次玩時才有這種感覺…

當機reboot過後, 定個神來, 已是晚飯時間, 在西灣一間好像叫阿里咖哩屋食葡國菜, 食物不過不失… 跟著到議事亭"再斬四兩", 先來珍珠奶茶(正如朋友所說, 香港的珍珠奶茶的茶無這裡的好, 而細粒珍珠也比大粒的好又不失口感), 再來幾隻煎餃, 雖然看來簡單, 但水準比香港的好, 香港的不是不脆就是太油太無味道, 這裡的煎餃就剛剛好…

而下一節目就是到酒吧街看當日英超, 比賽不甚精彩, 但很享受這種與三五知己hea住睇波的感覺… 球賽過後, 本想到新賭場逛逛, 但天公不做美, 忽然落大雨… 由於我們一行五人, 而澳門的的士大多是四人車, 所以便分兩車走, 朋友A與太太及朋友K先行回住處, 餘下我與朋友C, 等了好一會也等不到車... 言談間, 雖然雨還是很大, 但我和C卻原來"雅興未減", 不約而同地表示還想去賭場一躺, 結果我和C就相當熱血地冒雨走到賭場, 但其實這樣做是有點"衰仔", 事關K與A跟本毫不知情, 而C與我的電話並沒有漫遊, 結果就潛了兩小時水…

可能是"報應"吧, C與我結果都比錢何生使, 但誰知道, 原來報應是一浪接一浪…
潛水過後, C與我在將近12時回到住處, 但按門鈴卻沒有回音, 心想他們可能也出了去未返吧, 便打算打電話"求救", 誰知依住處行了一大個圈後, 卻發覺原來我們附近連一個電話亭也沒有, C與我頓時有家歸不得, 眼看絕望之際, 卻見到一熟悉的身影於遠處出現, 原來是K… 於終有屋企返啦!!!

回住處後一問才知之前沒人應門是因為K與A已訓著, 但更不好意思的是K擔心C與我找不著, 便在門口大閘等了我們半小時, 充當"蚊飯"…

得朋友如此, 我還可說甚麼呢? 這可以說是2007年的第二個感動位… Karin, 在此又老土地再一次多謝你啦~

為表歉意, C與我便到便利店買宵夜向大家賠罪… 接著就是深夜竹戰, 奇蹟地, 於西圈尾時已"釣魚"的我, 最後一局竟然還能自摸九番, 成為唯一羸家…

而到了第二天, 於三盞燈吃了重量級的緬甸早+午飯, 買了手信後就起程回港, 結束這次Hea遊澳門之旅…