得...得...得償所望~

開心到震!!!!!

撲左一個星期, 終於比我0向yahoo找到良心買家, 以一個超合理的價錢買到陳綺貞演唱會飛…
雖然要一個人睇, 但能入場聽陳綺貞唱live, 對我這個fans黎講就已經係一種幸福…

期待聽live的旅行的意義, 到時見!!!

雙面人

這天工作上遇上唔醒目仲要懷疑我既"合作伙伴", 立即毫不猶豫地加重語氣...

但當帶比我這幾年最大屈辱的"朋友"打電話來認衰時, 之前腦海排練很多次的"鬧人對白"卻變得吞吞吐吐, 心軟得好像還要自己為他找下台階...

"妖! 阿康, 你冇野下話?"
鬧自己反而咁果斷, 連我自己都好憎自己...

08日本敗家之旅 – 京都篇 Part 1

由於想慳兩晚酒店錢, 今次我地就選擇坐通宵巴士上京都, 用一整日既時間行京都, 然後又坐通宵車返東京。

我地大概11點幾左右上車, 第二朝5點幾就去到京都。雖然我呢個屯門仔好應該習慣0向巴士度訓, 但唔知點解今次就"燒鬚", 訓下醒下咁, 訓得唔係太好... 而當巴士到達京都之後, 我發覺隻腳又開始痛, 而且比之前仲要痛, 痛到要拐下拐下咁行...

由於我地去到只不過係五點幾, 當時太陽都未出, 凍到傻, 而我0向呢個又凍又痛既情況下, 當然要搵個地方避一避先, 但五點幾基本上咩餐廳都未開, 唯一落腳既地方就係火車站既售票處, 仲要係冇櫈既售票處... 但果陣已經痛到連行都成問題, 唯有坐0向地下休息休息, 希望休息完就好番, 而C就去check check市內觀光巴士時間...

原來架巴士要七點幾先有, 即係話我地要hea成兩個幾鐘先可以開始今日既行程... 再加上我隻痛腳, 想四圍行都唔得, 就算行, 外面又凍, 地下街既鋪頭又未開... 呢兩個幾鐘對我黎講真係好漫長...

"開啦~ 開啦~"

時間係上午七點幾, 開既係一間叫Subway既快餐店, 而今次係我咁大個人以黎第一次會因為一間快餐店開鋪而開心同感動... 0向Subway飲啖茶, 食個飽後, 就正式開始我地既京都之旅。

咁隻痛腳呢? 都唔理得咁多, 照行, 唔通坐Subway坐成日咩?

我地坐車去到八板神社附近落, 接著就由八板神社開始行。唔知係未間神社真係咁有靈氣, 行行下又唔覺痛... 清涼既上午、古色古香既舊建築、寧靜既環境，真係一個好適合散步觀光既setting, 人都醒神d!

八板神社

行完八板神社, 下一站我地就去到清水寺。相比八板神社, 清水寺就"游客區"好多, 沿途行上去既二板街同生寧街就係手信熱點, 手信同食既鋪頭多到冇朋友... 而去到清水寺參觀就要比入場費, 之後裡面有求籤、平安御守、姻緣石、仲有小食店, 各式各樣配合遊客既需要, 想唔跌錢都難...

個人唔好呢d八卦野, 所以都係齋睇, 但最後面對小食店, 始終都要失守... C叫左個紅豆湯湯圓, 我就叫左紅豆甜品加抹茶, 紅豆好甜, 但有抹茶送就0岩0岩好, 甜品雖然好食, 其實我最鍾意個境多d, 好有驛站休息feel...

紅豆甜品送抹茶

Hea住食同嘆茶, 好Relax囉~

食完野, 我同C決定兵分兩路, 各自去自己鍾意既地方... 佢就選擇參觀其他古建築, 而我, 就選擇留守二板街同生寧街"血拚"...

不認不認還需認, 鍾意行街買手信多過參觀, 我真係一個Shopaholic...

清水寺名物 - 神砂, 圖右為C比大家既Cross reference

08日本敗家之旅 –東京篇Part 3

Day 6 今日既重點節目係下晝去國立競技場睇Xerox Super Cup, 戲碼就係鹿島鹿角對廣島三箭, 鍾意鋤強扶弱既我當然做反派支持三箭啦...

雖然之前02世界杯都去過日本睇波, 現場睇氣氛係好, 但由於大部份都係觀眾而唔係fans, 支持既熱烈程度都係差d... 但今次就好唔同, 兩隊都有自己fans, 當介紹球員果陣, 一面fans會大力搖旗喝彩, 另一面fans就會噓聲四起, 淨係睇佢地好投入咁打氣都抵...

成個球場"紅當當"

黎到球場, 即刻有兩大驚喜, 驚喜一係估唔到坐咁前, 我第一次坐咁近球場睇波(大概第5行左右啦), 好好mood...

而驚喜二就係: 點解個球場會咁...... 細既? 粗略估計, 個場同旺角場差唔多大...

講番場波, 雖然場係細d, 但都冇損我睇波既興致, 而且場波足足有4個入球, 法定時間大家打成2比2, 要PK戰定勝負, 最後就由小弟支持既三箭12碼以4比3勝出, 我當然開心啦, 開心既仲有一班三箭fans, 班職球員仲好識做咁走去果邊慶祝, 氣氛好到不得之了... 但估唔到, 睇波之後就係我地獄"行"程既開始...

國立競技場位於澀谷區, 理應同購物熱點澀谷好近, 而我同朋友C都打算去行行睇睇, 於是就決定行去購物區, 其實球場附近都好靜局, 好適合散步, 行吓影吓相hea吓都係一個唔錯既地方, 行左大半個鐘左右, 我地就到左青山區, 然後就係表參道, 但對呢兩度d大牌潮牌興趣不大, 於是就繼續行去原宿...

去到原宿果陣, 我地成程行左大概個零兩個鐘, 接著就係掃鋪時間, 行左竹下通好多細鋪, 結果朋友C就冇斬獲, 我就買左件白Polo恤... 行完原宿, 其實個人都有d莫莫地, 不過我地又搵唔到地方落腳食飯, 於是就決定行埋去澀谷, 橫掂都係一個車站既距離者, 但結果都行左成半個鐘, 行到澀谷既旺區, 基本上我已經又餓又攰, 隻腳都唔聽使...

最後我地搵左間好舊好細既麵鋪食拉麵加抄飯set, 都幾好食, 但食完之後, 隻左腳就開始隱隱作痛... 心諗應該行行下就會冇事, 而且去到澀谷, 點可以唔行一轉? 於是就照掃澀谷, 行完就去東京站轉夜車, 去我地下一站 - 京都。

好有風味既舊麵鋪

行行下就會冇事? 之後原來愈行愈大件事… (待續)